Baile Átha Cliath le Gaeilge
Is deis iontach í bunú BÁC le Gaeilge chun cur le húsáid na teanga i gcathair Bhaile Átha Cliath - áit a bhfuil pobal mór Gaeilge inti mar gheall ar an réimse leathan eagraíochtaí Gaeilge atá lonnaithe ann. Ina measc siúd, tá seirbhísí luathoideachais, gaelscoileanna agus Gaelcholáistí, eagrais Gaeilge, dhá stáisiúin raidió a chraolann as Gaeilge, CLG na Gaeil Óga, cúrsaí tríú leibhéil i nGaeilge agus go leor eile.
Leag Conradh na Gaeilge, i gcomhpháirtíocht le Comhairle Cathrach Bhaile Átha Cliath, clár gníomhaíochtaí amach chun a chinntiú go mbeidh an teanga le cloisteáil agus le feiceáil níos mó timpeall chathair Bhaile Átha Cliath. Úsáidfear Ardoifig Chonradh na Gaeilge ag Uimhir 6 Sráid Fhearchair mar lárionad tacaíochta do ghnólachtaí agus don phobal chun eolas a sholáthar faoi na seirbhísí atá ar fáil as Gaeilge agus iad a spreagadh leis na seirbhísí sin a úsáid.
Déanfar na gníomhartha seo a leanas mar chuid den tionscnamh BÁC le Gaeilge:
- Gnólachtaí a spreagadh chun an Ghaeilge a úsáid ar chomharthaí, ar láithreáin ghréasáin, ar fhógraí agus ar bhiachláir i gcaiféanna agus i mbialanna
- Líonra Gaeilge a fhorbairt i measc gnólachtaí Bhaile Átha Cliath.
- Ceannáras stairiúil Chonradh na Gaeilge a úsáid mar ionad eolais agus tacaíochta don phobal.
- Oibriú chun Ceathrú/Ceantar Gaeilge a fhorbairt agus oibriú le Comhairle Cathrach Bhaile Átha Cliath chun plean teanga a fhorbairt don chathair amach anseo.
Má tá suim agat an Ghaeilge a chur chun cinn i do ghnólacht i gCathair Bhaile Átha Cliath, bí i dteagmháil linn:
Facebook: www.facebook.com/bacleg/
Instagram: www.instagram.com/baclegaeilge/
Twitter: www.twitter.com/Bac_leGaeilge
LinkedIn: www.linkedin.com/company/bac-le-gaeilge
