Conradh na Gaeilge

Tá Conradh na Gaeilge ag iarraidh ar an bpobal tacú leis na polaiteoirí is mó atá ag gníomhú ar son na Gaeilge sna toghcháin áitiúla ar an 5 Meitheamh 2009.

Tá an Conradh ag iarraidh ar dhaoine ceisteanna fiúntacha maidir le cur chun cinn na Gaeilge a chur ar na hiarrthóirí ar fad atá i mbun feachtasaíochta, go háirithe i dtaca le logainmneacha dúchais ar eastáit ina gceantair, i measc rudaí eile.

Arsa Pádraig Mac Fhearghusa, Uachtarán Chonradh na Gaeilge: "I bhfianaise thuarascáil an Athar Mhic Ghréil a léiríonn go bhfuil 93% de mhuintir na tíre ag iarraidh an Ghaeilge a chaomhnú nó a athbheochan, níl aon amhras ann ach go dtacaíonn pobal na hÉireann leis an teanga, agus is fiú an tacaíocht sin a léiriú go láidir do na polaiteoirí a thagann ag lorg vótaí sna toghcháin seo."

Tá an Conradh ag moladh go gcuirfí coistí logainmneacha ar bun ar fud na tíre i bpáirt leis na húdaráis áitiúla, ionadaithe ó An Post, saineolaithe áitiúla agus pobal an cheantair, agus go n-ullmhódh an coiste sin rogha ainmneacha Gaeilge d'fhorbróirí i gcás gach eastát tithíochta nua sa cheantar áitiúil.

Dúirt Julian de Spáinn, Ard-Rúnaí Chonradh na Gaeilge: "Tá Coiste Logainmneacha ag feidhmiú i nGaillimh le 10 mbliana anuas agus tá ainm Gaeilge ar gach eastát tithíochta nua ó shin dá thoradh. Cuireann sé seo go mór le stádas agus le feiceálacht na Gaeilge sa phobal agus ní hamháin go mbíonn dea-thionchar aige sin ar dhearcadh daoine ar an teanga, ach bíonn nasc ag na logainmneacha nua leis an stair áitiúil agus le dúlra an cheantair."

CRÍOCH

Tuilleadh eolais:
Pádraig Mac Fhearghusa
Uachtarán, Conradh na Gaeilge.
066 7124169 / 087 2901154

Julian de Spáinn
Ard-Rúnaí, Conradh na Gaeilge.
01 4757401 / 086 8142757