Is é an sprioc le hAoine na Gaeilge ná spreagadh a thabhairt do dhaoine, do ghrúpaí agus do chomhlachtaí úsáid a bhaint as a gcuid Gaeilge ar bhonn leanúnach gach mí.
Tá Aoine na Gaeilge ar ais do 2025! Beidh an tionscnamh, atá deartha chun daoine aonair, grúpaí, agus gnólachtaí a spreagadh chun an Ghaeilge a úsáid go rialta, ar siúl ar an Aoine dheireanach de gach mí, ag soláthar lá tiomnaithe chun an Ghaeilge a cheiliúradh agus a chleachtadh sa ghnáthshaol.
Tá sé mar aidhm ag Aoine na Gaeilge tógáil ar rath Sheachtain na Gaeilge le Energia trí dhaoine a spreagadh chun an Ghaeilge a úsáid ina ngnáthaimh laethúla tar éis mí an Mhárta. Is cuma trí imeachtaí eagraithe le cairde, le comhghleacaithe, le grúpaí pobail, nó trí chúpla focal a úsáid le strainséirí i siopaí, caiféanna, nó ar iompar poiblí, is deis iontach é Aoine na Gaeilge an Ghaeilge a fheiceáil agus a chloisteáil níos minice.
Leag Bláithín Nic an tSíthigh, Cathaoirleach Meitheal Aoine na Gaeilge, béim ar thábhacht an tionscnaimh seo:
“Bíonn go leor daoine spreagadh a gcuid Gaeilge a úsáid le linn Sheachtain na Gaeilge le Energia gach aon bhliain. Ba bhreá linn tógáil ar seo agus lá faoi leith a roghnú gach aon mhí le ceiliúradh a dhéanamh ar an nGaeilge agus chun grúpaí agus comhlachtaí a mhealladh leis an nGaeilge a chur chun cinn ar an lá sin. ”
Ag labhairt ag an seoladh inniu dúirt Brian Mac an tSionnaigh, Oifigeach Forbartha Gaeilge, Ionad Uíbh Eachach:
“Táimid an-sásta Aoine na Gaeilge a sheoladh anseo in Ionad Uíbh Eachach i mBéal Feirste. Bímid i gcónaí ag iarraidh deiseanna sóisialta trí Ghaeilge a chur ar fáil don phobal agus is deis í seo aird faoi leith a dhíriú ar imeachtaí Gaeilge a bhíonn ar siúl againn ar an Aoine dheireanach den mhí. “
Is deis ar leith í Aoine na Gaeilge leis an nGaeilge a dhéanamh níos feiceálaí agus níos inchloiste sa saol laethúil. Is cuma más cainteoir líofa thú nó díreach ag tosú amach, spreagtar gach éinne páirt a ghlacadh agus ár dteanga a cheiliúradh le chéile.
Tuilleadh eolais ar snag.ie/anag
Tá an feachtas Aoine na Gaeilge maoinithe ag Foras na Gaeilge.
